'संविधानका मुख्य विवादित विषयमा दलहरु सहमति नजिक'

११ पुस, काभ्रे । प्रधानमन्त्री सुशील कोइरालाले शासकीय स्वरुप र संघीयताका विषयमा दलहरु सहमति नजिक रहेको दाबी गरेका छन् ।

काभ्रेस्थित सूचना प्रविधि पार्कमा शुक्रबारदेखि सुरु भएको नेपाल जेसिसको ४१ औं राष्ट्रिय महाधिवेशनमा उनले संविधानका मुख्य विवादित विषयमा दलहरु नजिकिएको बताएका हुन् ।

प्रदेशका संख्या कति हुने भन्ने विषय बढी पेचिलो भएको भन्दै उनले पूर्वाधार नभएकाले सकेसम्म थोरै बनाउने प्रयास भैरहेको जानकारी दिए । ‘प्रादेशिक संरचना बढी भए हाम्रा लागि लाजमर्दो हुन्छ,’ प्रधानमन्त्री कोइरालाले भने, ‘अहिले प्रस्तावित प्रादेशिक संख्यालाई तीन वा चारमा पनि झार्न सकिन्छ ।’