अभिनेता आर्यन सिग्देलको फिल्म अलबिदा पौष २५ गतेबाट प्रदर्शनमा आउँदैछ । यही दिन रेखा थापाको अभिनय रहेको फिल्म 'तथास्तु' पनि हलमा लाग्दैछ । 

रेखा र आर्यन नेपाली फिल्म क्षेत्रका दुश्मन मानिन्छन् । यसैले पनि यो भिडन्तलाई २ दुश्मनको स्टारडम देखिने समय भनेर चर्चा गरिएको छ ।  अभिनेता सिग्देलले भने आफ्नो भिडन्त अरुसँग नभएको बताए । आर्यनले भने, 'मलाई कसको फिल्म आउँदैछ भन्ने मतलब छैन । मेरो प्रतिस्पर्धा मैसँग हो ।'

आर्यनले आफूलाई हेर्न दर्शक सधैं उत्सुक भएर रहने समेत बताए । बारम्बार रेखा थापासँग गाँसिए पनि आर्यन उनको बारेमा बोल्न त्यति उत्साहित भएको देखिदैन । आर्यनले आफ्नो कोही दुश्मन समेत नभएको बताए ।

हसन खानको निर्माणमा तयार भएको 'अलबिदा'मा आर्यनका साथमा अनिता आचार्य र हसनको अभिनय छ । यो फिल्ममा आर्यन प्रहरी अफिसरको भूमिकामा देखिएका छन् । 'अलबिदा'मा आर्यन र 'तथास्तु'मा रेखाले एक्सन दृश्य दिएका छन् । दुबैको एक्सन हेर्न दर्शक पक्कै आतुर छन् ।